Jettegryte i overflata på ei ca. 1 m høg steinblokk med flat overflate. Jettegryta er oval, ca. 125 cm x 185 cm, ca. ½ m djup og med rundla botn, og der kan stå vatn. Munnlege kjelder seier at ho skulle finnast i dette området. Ho blei attfunnen etter opplysningar som står i jordskiftet over Håberg og ein del av Skytel av 1856 og reinska 31.05.2024 då ho stod full av jord. Ho ligg øvst i bjørkebeltet, 35 m sør for ein bytingstein på ei steinblokk og 30 m søraust for ein neddotten varde på ei anna steinblokk. I bygdeboka for Eiken, bind 3, side 82 står det om Heilag Olav: Han stod på Fagerhei ved Skeie, så steig han tvers over Lygne og landa på garden Håberg, og der stod det lenge eit fotavtrykk i ein stein, men denne steinen er blitt sprengd bort under eit veganlegg. «Så reiste han vidare og kom til Rossheim» (feilskrift for Rosseheia). «Der var det en større stein som var uthôla som ei kjelde. Kjelda var full av vatn, og Olav drakk seg utørst. Han velsigna då kjelda. Sidan har ho aldri blitt tom for vatn. Kjelda heiter framleis den dag i dag St. Olavs-kjelda» (opplyst av Søren Håberg). Ho liknar andre jettegryter på vestre del av Agder som også heiter St. Olavs kjelde. Vandresegna seier at Heilag Olav slengde hatten sin i berget så at der samla seg vatn, som han drakk av. Registrert av Torfinn Hageland.
