Lokaliteten ligg på flat, dyrka mark på gnr. 16/4, 16/1 og 15/3. Flata ligg mellom 30 til 38 moh. og består av veldrenerte morenemassar. Det er grave 32 sjakter på flata, der 26 av sjaktene er med funn. Til saman er det påvist 41 strukturar, der 5 er tolka som kokegrop, 14 som stolpehol og 21 som meir ubestemte groper, fyllskifte/flekkar med trekol eller anna, i tillegg til ei mogleg flatmarksgrav. Det er funne fleire fossile dyrkingslag som strekk seg over store delar av lokaliteten. Lokaliteten er tolka som eit busetnad -og aktivitetsområde frå eldre og yngre jarnalder.

I nordleg del av lokaliteten er det påvist strukturar og rester av dyrkingslag, som her ligg rett under matjorda. Undergrunnen består av laus, grushaldig sand som fleire stadar har mykje stein. Mot sør vert det djupare og djupare, og massane består av inntil 2,5 m med kompakt sandhaldig silt over undergrunnen som består av veldig kompakt raudbrun silt eller grushaldig sand med stein. I sørleg del av lokaliteten er det funne fleirfasa dyrking (inntil 3 fasar i same sjakt), men og strukturar som ligg under det djupaste dyrkingslaget (inntil 1,5 m). Det er òg observert strukturar som ligg i den sandhaldige silten før undergrunnen eller mellom dyrkingslaga. Lokaliteten har fleire strukturar på ulike nivå, både over og under dyrkingslaga, som viser lang brukstid av området.

Det er fire dateringsprøvar frå lokaliteten som er sendt til analyse. Det resulterte i dateringar som strekk seg over ein periode på nesten tusen år. I frå fyrste del av romartid i eldre jarnalder til siste del av vikingtid i yngre jarnalder.