Like nord for Toresmyr er den kunstige bekken bygd rundt ein fjellnabbe ved at fjellet er kilt ut og det er bygd ein voll av stein og jord på utsida langs ei 4-500 m lang strekning. Vidare renn den kunstige bekken gjennom myr som er dika opp med handemakt. Han renn gjennom stemmen Med den gamle saga og forbi Den gamle saga. Aust for Ospelimyr og Eikemyr har det au vore lagt ned eit veldig arbeid for å få den kunstige bekken fram. Han renn under Gåseflåvegen, fyrste gongen. I lia nedover mot Otra er det bygd ein jord- og steinvoll for å tvinge bekken på tvers av lia langs ei 600 m lang strekning. For andre gong renn den kunstige bekken under Gåseflåvegen, dannar eit kunstig basseng og kastar seg utfor berga ned til Otra ved Gåseflå. Den kunstige bekken blir ennå brukt som vasskjelde for garden Gåseflå.