Husmannsplassen Herstølodden blei rydda rundt 1830 av Kristen Ånundsson gift med Anne Kristine Knutsdotter. Frå 1865 overtok Anna Elisabet Kristensdotter, gift med Tarald Olsson Lauen frå Lauen i Hægebostad sokn. Her blei Elias Taraldsson fødd i 1867. Elias gifta seg med enkja på sjølve Herstøl og flytta dit saman med foreldra sine i 1889. Herstølodden blei liggande øyde frå 1889, men innmarka på Herstølodden blei likevel slått av dei på sjølve Herstøl i lang tid etterpå. Både Tarald og sonen Elias hadde kunstnarevner og dreiv med treskjering av både knivar og tiner, og dei laga lommebøker i skinn. Både Tarald og Elias kunne mange slåttar som dei spelte på fele, og mange av slåttane hadde dei i tradisjon frå Hægebostad sokn. Nå viser berre tuftene etter husmannsplassen.