Lokaliteten ligg på ei opa flate, i eit elles hellande terreng. Den er omringa skog og høg vegetasjon og ligg på mellom 91 og 98 m.o.h. På eldre flyfoto kan ein sjå at det var mindre høg vegetasjon og skog i området, spesielt ned mot busetjinga og Førdefjorden, enn det er i dag. Området har vore rydda og brukt som beitemark, og truleg og dyrka i periodar.

Den består av fem positive prøvestikk (RET3, RET12, RET14-15 og AS14) som inneheld einfasa trekolhaldig lag. Mot vest, nord og aust er lokaliteten avgrensa av negative prøvestikk. Mot sør er den topografisk avgrensa da terrenget hallar kraftig nedover mot Førdefjorden herifrå.

Prøvestikka inneheld det som vart tolka for å vere restar etter rydning av området og/eller dyrking i førhistorisk tid. Det vart tatt ut ei dateringsprøve frå lokaliteten. Den vart tatt ut frå laget i RET3 og sendt inn til datering. Laget vart datert til siste del av eldre bronsealder (1322-1192 cal BC).