Husmannsplassen Herstøl blei rydda i 1703. Husmenn eller bygslarar var desse: Frå 1703 Kristen Larsson, frå 1725 svigerinna Ingjerd Aslagsdotter, frå 1732 nevøen Aslak Kristensson gift med Mari, frå 1749 Lars Kristensson, frå 1762 Gonild Larsdotter gift med Ånen Nilsson, frå 1777 Ingebrikt Bjørnsson, frå 1792 Marte Ingebriktsdotter gift med Ola Eilevsson, frå 1795 Rasmus Olsson gift med Asgjerd Torkelsdotter, frå 1835 Andreas Rasmusson gift med Anna Elisabet Gullufsdotter, frå 1841 Anna Elisabet Gullufsdotter gift med Tobias Tønesson, frå 1862 Abraham Andreasson, frå 1876 Ola Andreas Tobiasson gift med Andrea Tomasdotter, frå 1889 Andrea Tomasdotter gift med Elias Taraldsson Lauen. Elias hadde kunstnarevner og dreiv med treskjering av både knivar og tiner, og laga lommebøker i skinn. Elias hadde evnene sine etter far sin, Tarald Olsson Lauen, som også dreiv med dette og budde her til dess han døydde i 1901. Både Tarald og Elias kunne mange slåttar som dei spelte på fele, og mange av slåttane hadde dei i tradisjon frå Hægebostad sokn. Elias Taraldsson Lauen budde her fram til 1954.