Verkefnið Staðarhóll í Dölum: Höfuðból í minjum, sögu og sagnaritun er þverfagleg rannsókn sem var unnin á árunum 2020–2025 af hópi fræðimanna frá Fornleifastofnun Íslands, Stofnun Árna Magnússonar í íslenskum fræðum, Þjóðskjalasafni Íslands og Háskóla Íslands. Verkefnið fékk styrk úr Rannsóknarsjóði RÍM (Ritmenning íslenskra miðalda) og viðbótarstyrk úr Fornminjasjóði til fornleifaskráningar í Fagurey. Markmið Staðarhólsrannsókna var að efla rannsóknir á verkum Sturlu Þórðarsonar (1214–1284) og auka skilning á sögu og eðli jarðarinnar Staðarhóls, þar sem Sturla bjó og starfaði um áratuga skeið, og Fagureyjar, þar sem hann bjó á efri árum. Markmiðið var einnig að miðla rannsóknum og niðurstöðum til fræðimanna og almennings í gegnum fjölbreytta miðla, svo sem með útgáfu skýrslna, ritgerða, greina og bóka, ásamt því að fjalla um verkefnið á ráðstefnum, í héraði og með stafrænum hætti.
